Home 

Punkteilöse-Alass Ski Weekend Stoos

Ändli chömer wieder gmüetlich zämesitze und Öppis unternäh, en wichtige Teil vo de Hühnerbar-Crew! Das Mal simer anes Ski-Weekend uf de Stoos. Übernachtet hämer inere gmüetliche Hütte mit feinem Raclette, Spieli am Abig und händs gnosse eus wiedermal z gseh. Mir händ super Wätter gha und sind drum zwei Täg uf de Ski gsii und händ d Piste unsicher gmacht. Toll isches gsii, Danke em Marc für s Organisiere!

s Jahr 2021 vo de Hühnerbar - Crew

Au im Jahr 2021  händ mir vo de Hühnerbar - Crew kei Fäschter chöne organisiere oder en Teil devo sii. So isch das Jahr vor allem prägt gsii vo Hochziite oder Geburte vo Chind vo eusne Vereinsmitglieder*inne. Es hätt eus gfreut, a verschiedene Hochziite dörfe debii gsii si, danke für d' Iladige. Au es paar Bäumli mit Geburtstaflenä hämer dörfe go stelle, mir freued eus, für de Vereinsnachwuchsch isch aso gsorgt!

Punkteilöse-Alass Val Müstair

Euse Punkteilöse-Alass vom Herbst 2020 hätt eus is wunderschöne Val Müstair gfüert. Übernachtet hämer i de Jugi in Santa Maria womer en gmüetliche Abig mit grille und Spieli spielä verbracht händ. Am Samstig dänn hämer e Wanderig gmacht zum wunderschöne Lai da Rims bevor's aschlüssend wiiter gange isch nach Scuol. Nachemne wiitere gmüetliche Abig hämer am Sunntig es River Rafting gmacht womer debii alli ordentlich nass wordä sind und Spass gha händ. Merci viel Mal Mivi für s Organisiere. 

Punkteilöse-Alass Curling

Euse ersti Punkteilöse-Alass im Jahr 2020 hätt eus id Curling Halle vo Dübedorf gfüehrt. I Teams hämer det gägenand dörfe es chliises Turnierli spielä und viel Spass ha debii. Aschlüssend sind mir mitemne feine Fondue verwöhnt wordä. 

Canstatter Wasen in Stuttgart 2019

Was für es Weekend in Stuttgart! Jede Hälfer und jedi Hälferin chunt bi ihrne Isätz i de Hühnerbar Pünkt über. Bi Aläss chönd die Pünkt denn iglöst wärde. De diesjährig Punkteilöse-Alass hätt eus ad Canstatter Wasen in Stuttgart gfüert. Mir händ viel glacht, gschunklet, tanzt, fein gässe, usglasse gfiiret und die eint oder ander Achterbahn usprobiert. Schööön wars!

Hälferusfluug MEGA & Dorfgaudi 

D' MEGA z Berikä und s'Dorfgaudi sind verbi. So Aläss sind ned möglich ohni e Vielzahl a engagierte Hälfer*inne. Als Dank gits immer en Usflug. De hätt eus dasmal id Mytheregion gfüert und mir händ zäme zwei tolli Täg verbracht. Danke Marc für d' Organisation!

Dorfgaudi Oberwil 2019

S Dorfgaudi isch bereits wieder verbi und mir danked allne wo eus cho sind go bsueche. 

MEGA 2019

Vo Dunnstig bis Sunntig händ mir a de MEGA19 z Berikä zahlriichi Gäst därfe empfange. Trotz wächselndem Wätter isch es en super Alass gsii.