Ändli chömer wieder gmüetlich zämesitze und Öppis unternäh, en wichtige Teil vo de Hühnerbar-Crew! Das Mal simer anes Ski-Weekend uf de Stoos. Übernachtet hämer inere gmüetliche Hütte mit feinem Raclette, Spieli am Abig und händs gnosse eus wiedermal z gseh. Mir händ super Wätter gha und sind drum zwei Täg uf de Ski gsii und händ d Piste unsicher gmacht. Toll isches gsii, Danke em Marc für s Organisiere!
Au im Jahr 2021 händ mir vo de Hühnerbar - Crew kei Fäschter chöne organisiere oder en Teil devo sii. So isch das Jahr vor allem prägt gsii vo Hochziite oder Geburte vo Chind vo eusne Vereinsmitglieder*inne. Es hätt eus gfreut, a verschiedene Hochziite dörfe debii gsii si, danke für d' Iladige. Au es paar Bäumli mit Geburtstaflenä hämer dörfe go stelle, mir freued eus, für de Vereinsnachwuchsch isch aso gsorgt!
Euse ersti Punkteilöse-Alass im Jahr 2020 hätt eus id Curling Halle vo Dübedorf gfüehrt. I Teams hämer det gägenand dörfe es chliises Turnierli spielä und viel Spass ha debii. Aschlüssend sind mir mitemne feine Fondue verwöhnt wordä.
Was für es Weekend in Stuttgart! Jede Hälfer und jedi Hälferin chunt bi ihrne Isätz i de Hühnerbar Pünkt über. Bi Aläss chönd die Pünkt denn iglöst wärde. De diesjährig Punkteilöse-Alass hätt eus ad Canstatter Wasen in Stuttgart gfüert. Mir händ viel glacht, gschunklet, tanzt, fein gässe, usglasse gfiiret und die eint oder ander Achterbahn usprobiert. Schööön wars!
D' MEGA z Berikä und s'Dorfgaudi sind verbi. So Aläss sind ned möglich ohni e Vielzahl a engagierte Hälfer*inne. Als Dank gits immer en Usflug. De hätt eus dasmal id Mytheregion gfüert und mir händ zäme zwei tolli Täg verbracht. Danke Marc für d' Organisation!
S Dorfgaudi isch bereits wieder verbi und mir danked allne wo eus cho sind go bsueche.
Vo Dunnstig bis Sunntig händ mir a de MEGA19 z Berikä zahlriichi Gäst därfe empfange. Trotz wächselndem Wätter isch es en super Alass gsii.